Karongi:Abagabo baracyeka ko abajyana abagore babo gusengera mu ”butayu”babasambanyirizayo

Karongi:Abagabo baracyeka ko abajyana abagore babo gusengera mu ”butayu”babasambanyirizayo

August 30, 2022 Off By M COBRA

Abagabo bafite abagore baretse gusengera mu nsengero, ubu bakaba basengera mu mashyamba no mu buvumo aho bita mu butayu bavuga ko abagore babo badukanye imico mibi irimo gusesagura imitungo y’ingo n’ubushizi bw’isoni.

Abafite iki kibazo ni abagabo biganjemo abafite abagore banze kwikigiza Covid-19, abanze gusengera mu nsengero bavuga ko batemera n’abapasiteri, bakemeza ko abapasiteri bikingije iki cyorezo bataye umurongo w’Imana.

Umwe mu bagabo bo mu Murenge wa Rubengera bafite abagore banze kwikingiza COVID-19 kubera imyemerere yabo yavuze ko umugore we amaze amezi abiri atangiye kujya gusengera mu misozi.

Uyu mugabo wadusabye kutagaragaza imyirondoro ye, avuga ko kuva umugore we yatangira kujya gusengera mu misozi amahoro yabuze mu rugo rwabo kuko uwo mugore ataha amutuka.

Ati “Tumaranye imyaka 15, yari ataranyita imbwa, yari ataranyita ikigoryi, ariko muri iyi iminsi yanyise imbwa, anyita ikigoryi. Birashoboka ko babasambanyirizayo kuko umuntu ntashobora kukwita imbwa, cyangwa ikigoryi atumvishe uburyo ashobora kugutandukanya n’abandi bagabo.”

Undi mugabo ufite iki kibazo, avuga ko mu minsi ishize yatashye ageze mu rugo iwe ahasanga umushyitsi atazi wari waturutse mu Karere ka Rubavu. Icyo gihe umugore we yamubwiye ko uwo mushyitsi ari uwaje kubasengera.

Umugore we yahaye uwo mushyitsi ibihumbi 16Frw by’itike, hashize iminsi uwo mushyitsi ahavuye umugore we ntiyongeye gusengera mu rusengero ahubwo yayobotse iyo mu mashyamba no mu bihuru aho bahurira ari abagore nka 50 barimo abagabo bane.

Ati “Iyo avuyeyo aza ambwira ngo ndi shitani, ngo ndi umupagani, mbese nta jambo nkigira mu rugo. Kuva yajyayo nta mutekano mfite.”

Uyu mugabo akomeza avuga ko abantu basengana n’umugore we ku misozi harimo abo asanzwe aziho uburaya, akavuga ko abo bantu banduje umugore we umuco mubi w’uburaya.

Ati “Mu bantu basengana harimo abo nzi bari indaya kandi nziko batabiretse. ntabwo nabona umuntu agendana n’indaya ngo numve ko atari kwiga kubayo.”

Aba bagabo banafite impungenge z’uko abasengera ku misozi no mu buvumo bashobora kuzakwirakwiza indwara kuko aho basengeta hataba ubwiherero. Aha niho bahera basaba ko ubuyobozi bwabafasha bagasubira gusengera mu nsengero zizwi.

Umwe muri bo ati “Twumva mwabacyaha bakajya gusengera mu nsengero zizwi bashaka bakamarayo n’icyumweru. Ku Baporo hari insengero, ku Badive hari insengero, ahantu hose hari insengero hano muri Rubengera”.

Imisozi aba bantu bakunda gusengera ni Kanyiramugozi na Bwemambure.

Martha Nyiransengiyumva, umwe mu bavugwaho gusengera kuri iyi misozi avuga ko impamvu abantu bajya gusengera mu butayu ariko baba bashaka ahantu hatuje ho kwihererana n’Imana.

Ati “Naho ubundi ntaho Imana itaba. Abantu bajya gusengera mu butayu bagasambanirayo nanjye nabyumviseho, inaha i Rubengera, ngo ni ukumarana irari.”

Nyiransengiyumva akomeza avuga ko atumva ukuntu umuntu yaba yagiye mu butayu gusenga ngo nagerayo asambanireyo.

Ati “Hoteli na Lodge birahari, numva abakeneye gusambana ariho bajya aho kujya gusambanira mu butayu mu masengesho.”

Umunyabanga Nshingwabikorwa w’Umurenge wa Rubengera, Nkusi Médard yavuze ko amakuru y’abantu basengera ku misozi ntayo bazi.

Ati “Ntabwo ayo makuru nyazi, icyemewe ni uko abantu basengera mu nsengero zahawe n’ibyangombwa. Bibaye bihari abaturage batubwira tukamenya amakuru tugakurikirana abo bantu bagahanwa”.
Abagabo bakeka ko bagenzi babo bajyana abagore babo gusengera mu misozi ya Bwimambure na Kanyiramugozi bakabasambanyirizayo