CHOGM: Madamu Jeannette Kagame yagarutse ku bana b’abakobwa bashyingirwa batarageza igihe

CHOGM: Madamu Jeannette Kagame yagarutse ku bana b’abakobwa bashyingirwa batarageza igihe

June 23, 2022 Off By M COBRA

Madamu Jeannette Kagame yasabye ko ikibazo cy’abana bashyingirwa batarageza ku myaka y’ubukure n’ihohoterwa rishingiye ku gitsina muri rusange gishakirwa igisubizo cyihuse kugira ngo uburinganire nk’intego ya gatanu y’iterambere rirambye izagerweho mu 2030.

Yabigarutseho ubwo yafunguraga ihuriro ry’abagore bo mu bihugu biri muri Commonwealth yatangiye kuri uyu wa Mbere i Kigali. Ni imwe mu nama zigize iy’abakuru b’ibihugu na za guverinoma zo mu bihugu bikoresha ururimi rw’Icyongereza (CHOGM).

Iri huriro ryitabiriwe n’abantu barenga 500 barimo 200 baturutse mu Rwanda, ririgira hamwe ingingo zirimo umugore mu buyobozi, kurwanya ihohoterwa rikorerwa umugore n’umukobwa, imihindagurikire y’ikirere ndetse n’ibijyanye n’iterambere ry’umugore mu bukungu.

Madamu Jeannette Kagame

Madamu Jeannette Kagame yavuze ko iri huriro risanze hari ibibazo binyuranye birimo ubusumbane bushingiye ku gitsina, ingaruka za Covid-19, ihohoterwa rishingiye ku gitsina n’ibindi bikeneye igisubizo mu maguru mashya.

Ati “Nyuma y’ibyo kandi, birababaje kumenya ko kimwe cya kabiri cy’abagore ku Isi yose bakorewe ihohoterwa rishingiye ku gitsina cyangwa bazi umugore warikorewe. Nta kwihangana guhari ku kuba ubu bitatu bya kane bya miliyari y’abana b’abakobwa bashyingirwa ku gahato. Uko twese tubizi, abana ntabwo bashobora kwemererwa gushaka”.

Madamu Jeannette Kagame yavuze ko hakwiye ishoramari rikomeye mu bushake bwa politiki, ubuvugizi, ubufasha mu by’imari, ubufatanye, ubushobozi n’ubumenyi bifasha mu kugera ku buringanire no kubakira ubushobozi abagore n’abakobwa bitarenze mu 2030.

Raporo ya Banki y’Isi igaragaza ko buri munsi abakobwa ibihumbi 41 bashaka abagabo batarageza ku myaka 18, ni ukuvuga miliyoni 15 buri mwaka. Ibi bizahombya ibihugu biri mu nzira y’amajyambere miliyari 1000 z’amadolari mu 2030.

Haba harebwe ku mitungo ibagendaho cyangwa ibyo bakabaye binjiza, biba bitakibonetse. Kurandura burundu iki kibazo, byatuma mu 2030 ibihugu bizigama 5% by’ingengo y’imari bishyira mu burezi.

Madamu Jeannette Kagame yagarutse ku rugendo u Rwanda rwanyuzemo mu guteza imbere abagore, avuga ko nyuma ya Jenoside yakorewe Abatutsi ababohoye igihugu bagombaga no gushyiraho gahunda irambye y’uburinganire, iyi ikaba yaraje kuba inkingi y’imibereho myiza, uburumbuke ndetse no guteza imbere abakobwa, abagore n’imiryango muri rusange.

Ati “Uruhare rw’abagore n’abakobwa rwavuye ku kuba inzirakarengane z’amakimbirane bahinduka abari ku ruhembe rwo kurinda amahoro arambye hagati yabo n’ibihugu. Uruhare rw’abagore mu kubaka amahoro, rwabaye umusingi w’iterambere ry’u Rwanda”.

Mu 2021, u Rwanda rwari ku mwanya wa karindwi ku rwego rw’Isi mu guteza imbere uburinganire, n’urwa kabiri muri Afurika inyuma ya Namibia iri ku mwanya wa gatandatu ku rwego rw’Isi. Iceland, Finland, Norvège, Nouvelle Zelande na Suède ni byo bihugu biza imbere ya Namibia n’u Rwanda.

U Rwanda rwagabanyije icyuho cy’umushahara hagati y’abagabo n’abagore nka kimwe mu bipimo by’ingenzi bigaragaza urwego rw’uburinganire mu gihugu, ku kigero cya 80%, ari na rwo rwa mbere muri Afurika. Mu nzego zimwe na zimwe nk’urw’ubuzima, u Rwanda ruri mu bihugu bike ku Isi byabashije kugera ku rwego abagore n’abagabo babona serivisi z’ubuvuzi bakeneye mu buryo bungana.

U Rwanda kandi ruzwi ku rwego mpuzamahanga mu kugira umubare munini w’abagore bari mu Nteko Ishinga Amategeko, aho bagera kuri 61%, Sena ikagira 38%, Guverinoma ikabamo 50% mu gihe inzego z’ibanze zigomba kuba zigizwe na 30% by’abagore, nk’uko amategeko abivuga.

Umunyamabanga Mukuru wa Commonwealth, Patricia Scotland, yavuze ko ari iby’agaciro kuba iri huriro ribereye mu Rwanda, igihugu kiri ku isonga mu guteza imbere abagore, kandi na bo bakaba bakomeje kugira uruhare mu kwiyubaka no mu mpinduka rukomeje kugeraho.

Yibukije ko ari inshingano za buri wese gushyira abagore ku ruhembe rwo guhangana n’icyorezo cya Covid-19, kurandura ihohoterwa iryo ari ryo ryose no gushyigikira uruhare rwabo mu rugamba rwo guhangana n’imihindagurikire y’ibihe.

Ati “Dushyigikire ubushobozi bw’abagore n’abakobwa muri Commonwealth tubahe amahirwe yo gutanga umusanzu mu nguni zose z’imibereho myiza, ubukungu, politiki n’ibindi”.

Ihuriro ry’abagore muri Commonwealth ririmo ibiganiro bizarebera hamwe ibisubizo by’ibibazo byugarije abagore n’abakobwa muri uyu muryango ndetse no kurebera hamwe uko buri gihugu gifite politiki na gahunda zo kugera ku buringanire bwuzuye mu 2030.